Utthama Villan

'விஸ்வரூபம்-2' படத்தைத் தொடர்ந்து 'திருப்பதி பிரதர்ஸ்' லிங்குசாமி தயாரிக்கும் படத்தில் நடிக்கிறார் கமல்ஹாசன்.

இந்தப் படத்திற்கு கிரேஸி மோகன் கதை, வசனம் எழுதுகிறார். ஆக்ஷன், காதல், சென்டிமெண்ட், காமெடி என எல்லா ரூட்டிலும் கலக்கும் கமல், இந்தமுறை காமெடியைக் கையில் எடுத்திருக்கிறார். 

'தசாவதாரம்' படத்தில் வரும் பல்ராம் நாயுடு கதாபாத்திரம் போன்று காமெடி கலந்த வில்லன் வேடத்தில் நடிக்கிறார் கமல். படத்துக்கு 'உத்தம வில்லன்' என பெயரிட்டிருக்கிறார்கள்.

இந்தப் படத்தை முதலில் கமலே இயக்குவதாக இருந்தது. பின்னர், நடிகரும், கமலின் நண்பருமான ரமேஷ் அரவிந்த இயக்குவதாகச் சொன்னார்கள். ஆனால், இயக்குநர் யார் என்பது குறித்த அதிகாரப்பூர்வ அறிவிப்பு இன்னும் வரவில்லை. 

தற்போது இந்தப் படத்துக்கு இசை அமைக்க யுவன்சங்கர் ராஜா ஒப்பந்தம் செய்யப்பட்டிருக்கிறார். கமலுடன் முதன்முறையாக யுவன் இணைகிறார் என்பது குறிப்பிடத்தக்கது. 

கமல் - இளையராஜா கூட்டணி 1980, 90-களில் மிகப்பெரிய ஹிட் பாடல்களைக் கொடுத்தது. யுவனின் சகோதரர் கார்த்திக் ராஜாவும் 'காதலா காதலா' படம் மூலம் கமலுடன் இணைந்து ஹிட் கொடுத்தார்.

தற்போது அந்த வரிசையில் யுவனும் இணைந்துள்ளதால், மிகப்பெரிய ஹிட் பாடல்கள் உறுதி என்று ஆர்வத்துடன் காத்திருக்கிறார்கள் கமல் - யுவன் ரசிகர்கள்.